 ئیبنو مەسعود بۆ یەکەم جار قورئان بەئاشکرا دەدات بەگوێی بێ باوەڕەکان دا
هاوەڵانی پایەبەرز عەبدوڵڵای کوڕی مەسعود رضي الله عنه هەستا بەم کارە گران و قورسە....
عوڕوە دەگێڕێتەوە لە باوکی یەوە و دەفەرموێت:(یەکەم کەس کە بە ئاشکرا قورئانی خوێند دوای پێغەمبەری خوا ﷺ لە شاری مەککەدا عەبدوڵڵای کوڕی مەسعود بوو، ڕۆژێکیان هاوەڵانی پێغەمبەر ﷺ لە ناوخۆیاندا وتیان:وەڵڵاهی هەتا ئێستا قوڕەیش گوێی لەو قورئانە نەبووە کەبە ئاشکرا بەڕوویاندا بخوێنرێت، بۆ یەکێ لە ئێوە بە ئاشکرا ناچێت بەڕوویاندا بیخوێنێت؟ عەبدوڵڵا وتی:من دەچم،ئەوانیش وتیان:دەترسین کە تووشی ئازار ببیت،ئێمە پیاوێکمان دەوێت عەشیرەتێکی لە پشت بێت و بەرگری لێ بکات لە ستەم و چەوسانەوە و دژایەتی ئەوان، ئیبنو مەسعود رضي الله عنه وتی:وازم لێ بێنن خوای گەورە پشت و پەنامە ، زوبەیر ڕەزای خوای لێبێ دەفەرموێت:لەکاتی چێشتەنگاو عەبدوڵڵای کوڕی مەسعود خوای لێ ڕازیبێ ڕۆیشت،تاگەیشتە مەقامی ئیبراهیم وە قوڕەیشیش لە جێگەی دانیشتنەکانی خۆیاندا بوون لە نزیک کەعبەوە،ئیبنو مەسعودیش هاتو لای مەقامی ئیبراهیم وەستا ئەنجا:(بِسْمِ اللَّهِ الرَّحْمَٰنِ الرَّحِيمِ )ی کرد و بەدەنگی بەرز ڕووی تێکردن و سورەتی ڕەحمانی بۆ خوێندن،(الرَّحْمَٰنُ ( ۱ ) عَلَّمَ الْقُرْآنَ ( ۲ ) )ئەوانیش وردبوونەوە لێی وتیان :ئەوە کوڕەکەی ئیبنو ئوم عەبد نییە ئەوە باسی چی دەکات؟ هەندێکیان وتیان:ئەوە هەندێ لەوانەی کە بۆ موحەمەد هاتووە دەیخوێنێتەوە ، ئەوانیش هەستان بۆی وتاکو توانیان لە دەم و چاو ڕوویاندا،ئەویش هەر قورئانی دەخوێند تاگەیشتە ئەو جێگەیەی کە خوای گەورە ویستی لێ بوو خوێندنەکەی پێی بگات،ئینجا دوای ئەوە لێی دوورکەوتنەوە و ئەویش گەڕایەوە بۆناو هاوەڵانی و هەموو دەم چاوی خەڵتانی خوێن بوو بوو ئەوان پێیان وت:ئێمە ترساین کە تووشی ئەمە ببیت،ئەویش وتی:وەڵڵاهی دوژمنانی ئاینی خوا ئێستاش لای من سووک و ڕیسواترن ئەگەر پێشتان خۆشە بەیانی دەچمە وە بۆ گیانیان و قورئانیان بەسەردا دەخوێنم وتیان:ئەوەندە بەسە کە تۆ بە ڕوویاندا خوێندووتەتەوە.
ــــــــــــــــــــــــــــــــــــــــــــــــــــــــــــــــ
ژیانی پێغەمبەری خوا ﷺ لە قورئان و فەرموودەکاندا
نوسینی:محمد ملا فائق شارەزووری
بەرگی یەکەم
ص:۱۰۳-۱۰٤
|