 ناشیرین کردن و شکاندنی بتەکانی قوڕەیش
ئیمامی عەلی خوا لێی ڕازیبێ دەفەرموێت:من و ئوسامە دەچووین بۆلای بتەکانی قوڕەیش کە لە چواردەوری کەعبە بوون دەچووین شتی پیسمان دەهێناو شتێکمان دەگرت بەدەستمانەوە دەمان هێنا بەڕووی بتەکاندا و پیسمان دەکردن کە ڕۆژمان لێ دەبووەوە(دیارە بە شەو ئەنجامیان داوە و کەس لەو ناوە نەبوو)و بێ باوەڕەکان کە دەچوون سوجدە بەرن بۆ بتەکانیان تەماشایان دەکرد و دەیان بینی چیان لێ کراوە و دەیان وت:ئەمە کێ وای لە خواکانمان کردووە،ئینجا دەچوون بەشیرو ئاو دەیان شت و پاکیان دەکردەوە و دەیان سڕییەوە....).
لەڕیوایەتێکی تردا ئەوە دەگەیەنێت کە پێغەمبەر ﷺ ئیمامی عەلی خستۆتە سەر شانی بۆ ئەوەی ئەو بتەی کە داکوتراوە بە قورقوشم بە سەر کەعبەدا فڕێی بداتە خوارەوە و پارچە پارچەی بکات. لە ئیمامی عەلییەوە خوای لێ ڕازیبێ دەفەرموێت:(من و پێغەمبەر ﷺ ڕۆیشتین تا گەیشتینە لای کەعبە، پێغەمبەر ﷺ فەرمووی:دانیشە منیش دانیشتم و چووە سەرشانم و ویستم بەرزی بکەمەوە نەمتوانی بینی کە نەمتوانی،ئینجا ئەو دانیشت و من چوومە سەرشانی موبارەکی و فەرمووی:سەرکەوە بۆ سەر هەردوو شانم ، منیش سەرکەوتم کە بەرزی کردمەوە وام دەزانی کە ئەگەر دەست بەئاسمانیش بگرم دەستم دەیگاتێ تا بەرز بوومەوە بۆ سەر کەعبە و بتێکی تیابوو کە بە قورقوشم یان بە مس داکوترابوو منیش بەلای ڕاست وبەلای چەپ و لای پێشو پاش جووڵەم پێ کرد هەتا هەڵم کەند کە هەڵم کەند،
پێغەمبەر ﷺ فەرمووی :فڕێی دە لەو بەرزایییەوە، منیش فڕێمدا وەک شووشە پارچە پارچەبوو، ئینجا دابەزیم من و پێغەمبەر ﷺ بەپەلە خۆمان شاردەوە وچووینه وە بەرەو ماڵ بۆ ئەوەی کەس نەمان بینێت وە لە ڕێگادا کەس پێمان نەزانێت.
ـــــــــــــــــــــــــــــــــــــــــــــــــــــــــــــ
ژیانی پێغەمبەری خوا ﷺ لە قورئان و فەرموودەکاندا
نوسینی:محمد ملا فائق شارەزووری
بەرگی یەکەم
ص:۱۰٥-۱۰٦
|