بەخێربێن بۆ پێگەی پێغەمبەر (صلی الله علیه وسلم)
لە ژيانى پێغەمبەر (ﷺ) فيربووم : سەركردەى لێهاتوو شوێن كەوتوو بەرهەم ناهێنێت ، بەڵكو سەركردەى وەك خۆى دروست دەكات .
چه‌ند وته‌یه‌كی جوان: 1ـ ئارامی‌ عیباده‌تێكه‌ به‌بێ‌ زه‌حمه‌ت ، هه‌یبه‌تيكه‌ به‌بێ‌ قودره‌ت ، قه‌ڵایه‌كه‌ به‌بێ قه‌ڵغان ، سه‌ركه‌وتنێكه‌ به‌بێ‌ چه‌ك. 2ـ ماڵێك كه‌ هیچ كات وێران نابێت عه‌داله‌ته‌. 3ـ نه‌خۆشیه‌ك ده‌رمانی‌ نییه‌ بێ ئه‌قڵیه.‌ 4ـ شیرینیه‌ك دوایی‌ ده‌گۆرێت به‌ تاڵی‌ هه‌واو ئاره‌زوویه‌. ‌5ـ تاڵیه‌ك دوایی‌ ده‌گۆريت به‌شیرینی‌ صه‌بر و ئارام گرتنه‌. 6ـ ئه‌گه‌ر پشووی‌ لاشه‌ به‌كه‌می‌ خۆراكه‌ ئه‌وا پشووی‌ دڵ و ده‌روونیش به‌كه‌می‌ گوناهه.‌
پێویسته‌ هه‌میشه‌ له‌ بیرمان بێت كه‌ تاوه‌كو زستان ساردو سه‌ختتر بێت ئه‌وا به‌هاری رازاوه‌ترو جوانتر دێته‌ پىش چاو.
علی كوری به‌بو تالیب (ره‌زای خوای لى بێت) ده‌فه‌رموێت: دونیا وه‌كو مار وایه‌، رواڵه‌تی بریقه‌داره‌و ناخی هه‌ڵگری ژه‌هرێكی ترسناكه‌، ئه‌وه‌ی لێی نزیك ده‌بێته‌وه‌ گه‌مژه‌یه‌و ناحاڵیه‌، ئه‌وه‌ی لێی دوور ده‌كه‌وێته‌وه‌ خاوه‌نی ژیریه‌.
پێغەمبەر (صلی الله علیه وسلم) لە شاری مەدینە
 مردنى (عبدالله بن أبي بن السلول)
05/11/2019
بینین: 533
(عبدالله بن أبي بن السلول) لە مانگى (ذي الحجة) ى ساڵی نۆیەمى کۆچیدا ، مرد .
(عبدالله بن أبی بن السلول)  کە سەرۆکى مونافیقەکان بوو ، کوڕێکى بووە بە ناوى (عبدالله) و کوڕێکى زۆر صاڵح و چاک بووە، جا دواى مردنى بابى ، دێتە خزمەت پێغەمبەر ﷺ و دەڵێ : ئەى پێغەمبەرى خوا ! بابم مردووە ، ئەگەر بێی نوێژى لەسەر بکەى ، ئەویش دەفەرموێ : باشە دێم ، هەروەها داواشى لێ دەکات و دەڵێ : ئەى پێغەمبەرى خوا ! بابم زۆر لەگەڵم چاک بوو ، ئەگەر کراسەکەى خۆشتى بدەیتێ بۆ ئەوەى پیی کفن بکەین ، بەڵکو لە عەزاب و سزا چەپاڵە بدرێ ، دەفەرموێ : باشە ، کراسەکەشى دەداتێ و ئینجا لەگەڵیشى دەچێ تا سەر گۆڕستان ، لەوێش بەرامبەر جەنازەکە ڕادەوەستێ، بۆ ئەوەى نوێژى لەسەر بکات ، عومەریش خوا لێی ڕازى بێ دەچێتەپێشى و دەڵێ : ئەى پێغەمبەرى خوا ﷺ نوێژ لەسەر ئەوە دەکەى ؟ هەر ئەوە بوو فڵان ڕۆژە وایگووت و فڵانە ڕۆژە ئاواى کرد ... هتد ، وە زۆر لە هەڵوێستە خراپەکانى باس دەکات ، دجوایی پێغەمبەر ﷺ زەردەخەنەیەکى دێتێ و دەڵێ: خۆت لادە عومەر من سەرپشک کراوم لە نوێژ لەسەر کردنى و لەسەر نەکردنى ، دوایی پێغەمبەر ﷺ نوێژى لەسەر دەکات ، و دەچێت بۆ سەر قەبرەکەشى ، دواى ئەوە زۆرى نەخایاند ئەم ئایەتە هاتە خوارێ :
  { وَلَا تُصَلِّ عَلَى أَحَدٍ مِنْهُمْ مَاتَ أَبَدًا وَلَا تَقُمْ عَلَى قَبْرِهِ إِنَّهُمْ كَفَرُوا بِاللَّهِ وَرَسُولِهِ وَمَاتُوا وَهُمْ فَاسِقُونَ (٨٤)} التوبة .
واتە : لەمەودوا نوێژ لەسەر هیچ کام ( لەوانەى کە دەزانى مونافیقن ) مەکە ، وە لەسەر گۆڕەکەشیان ڕامەوەستە ، چونکە ئەوان بڕوایان بە خواو پێغەمبەرەکەى نەبووە ، و بەلاریی مردوون ، واتە : لە مەڕاسیمى بەخاک سپردنیشدا ئامادە مەبە .
دیارە ئەم هەڵوێستەش یەکێکى دیکەیە لەو هەڵوێستانەى کە عومەر خوا لێی ڕازى بێ ، پێشنیارى کردووە خواى زاناو شارەزاش وەحى ناردۆتە خوارێ و موافیقى پێشنیارى ئەو بووە ، شایانى باسیشە ، دواى ئەوە ، پێغەمبەر ﷺ تا وەفاتى کرد نوێژى لەسەر هیچ مونافیقێک نەکردوەو نەچۆتە سەر گۆڕەکانیشیان لەکاتى نێژراندا .
________________________
پوختەى ژیاننامەى پێغەمبەرى خوا ﷺ /  مامۆستا عەلى باپیر
لاپەڕە  / (٦٩٨، ٦٩٩)

زیاتر

1
Copyright. All Rights Reserved.
مافی بڵاوکردنه‌وه‌ی بابه‌ته‌کان پارێزراوه بۆ پێگه‌ی پێغه‌مبه‌ری خوا،
هه‌رکه‌سێک بابه‌ته‌کان کۆپی بکات پێویسته ئاماژه به‌ سه‌رچاوه‌که‌ی بکات که‌ پێگه‌ی پێغه‌مبه‌ری خودایه